Нашиот сограѓанин Д-р Марјан Темовски на меѓународен тренинг курс во Кина
Во периодот од 13 до 27 ноември 2016 во Гуилин, Кина, се одржа 8-от Меѓународен тренинг курс „Интегрирана контрола на карпестото опустинување,јаглеродниот циклус и акумулација во карстниот систем (Integrated Control on Rocky Desertification, Carbon Cycle and Sink in the Karst System)“ во организација на Меѓународниот истражувачки центар за карст под покровителство на УНЕСКО (UNESCO International Research Center on Karst), спонзориран од Геолошкиот завод на Кина, Институтот за карстна геологија при Кинеската академија на геолошки науки и Канцеларијата на УНЕСКО во Пекинг.
На тренинг курсот учествуваа 34 учесници, од кои половина беа од Кина, а останатите 17 учесници од 12 земји и тоа: Бразил (2), Индонезија, Иран, Македонија, Малави, Мексико, Монголија, Мјанмар, Србија, Словенија (2), Тајланд (4) и Зимбабве.
Како претставник од Македонија учествуваше д-р Марјан Темовски, карстолог и спелеолог, кој моментално работи во Лабораторијата за истражување на животната средина на Институтот за нуклеарни проучувања при Унгарската академија на науки во Дебрецен, Унгарија. Неговите моментални истражувања се насочени кон проучување на процесите на постанок на пештерите, како и проучување на пештерските украси со цел утврдување на палеоклиматските услови, преку проучување на хипогените термални пештери во Мариово и пештерските украси на Галичица. Воедно е еден од основачите и претседател на Спелеолошкиот клуб „Златоврв“ – Прилеп.
Предавањата опфаќаа повеќе аспекти на карстниот систем, од карстна геологија, хидрогеологија, геохемија, екологија до аспекти на искористување, деградација и управување со карстните ресурси, со посебен фокус на циклусот на јаглеродот во карстниот систем и процесите на опустинување на карстните терени преку обесшумување и губење на почвениот слој и можности за нивна реставрација.
Последните денови од курсот беа наменети за проверка на учесниците, при што секој учесник ги презентираше карактеристиките на карстот во земјата од која доаѓа со посебен аспект на темата на курсот, а резултатите беа дискутирани од комисијата за проверка. На крајот на учесниците им беа доделени сертификати за успешно завршен курс, а признанија за посебно истакнати учесници им беа доделени на седум учесници: Марјан Темовски (Македонија), Јуре Тичар и Лени Озис (Словенија), Вељко Мариновиќ (Србија), Кимија Аџајеби (Иран), Рафаел Камарго (Бразил) и Пипит Виџајанти (Индонезија).
Иако досега не е посебно проучувано, карпестото опустинување и обесшумувањето на карстните терени е честа појава во Македонија, на која во иднина треба да и се посвети поголемо внимание, особено од акспект на управувањето со карстните ресурси, како на пример подземните карстни води, кои иако далеку од целосно искористени, учествуваат со околу 40% од водоснабдувањето во Македонија.