Форум за авангардна креативност, ФАК, е невладина организација која 11 години работи во областа на културата и уметноста, во насока на промоција на културниот идентитет препознатлив во меѓународни рамки. Мисијата е заштита на културното наследство и подобрување на условите на граѓаните за квалитетен живот со вложување во културата и културниот туризам. Kонстатирајќи го огромното културно-историско богатство на Прилеп и околината, следејќи ги глобалните текови, чии главен акцент е ставен врз културното наследство на народите, дојде до идеја истото да стане достапно за домашната и меѓународната јавност. Така во изминатите неколку години активно работеше на оваа проблематика и имплементираше повеќе проекти од големо значење за градот, насловени како:

„Варош, културна гордост, традиција и ревитализација на комплексот Маркови Кули“, од кои произлезе:
-Изградба на мултимедијално плато во населбата Варош
-Изградба на туристичката патека Крал Марко, која ги поврзува околните цркви во населбата Варош
-Изградба на амфитеатар кај карпата „Слон“

Со ова, Форумот за Авангардна Креативност несомнено го постави темелот на развојот на културниот туризам и влез на Прилеп во туристичката карта на Европа.
ФАК во рамките на својата годишна програма ја реализира младинската уметничка колонија Че АРТ , како и фестивалот „Прилепски Заговор“, кој значи реафирмирање на вредностите на џезот, блузот, рок-ен ролот, авангардната сцена и современите музички правци, презентирани од претставници од Македонија.
Оваа организација во соработка со Локалната самоуправа на општина Прилеп, како нејзин постојан партнер, го реализира и проектот „Културен Инфо Центар“ поддржан од Влада на Република Македонија. Проектот предвидува промоција на културниот идентитет, заштита на културното наследство и развој на туризмот во Прилеп.