Во Прилеп библиотечното дело датира уште од времето на Јордан Хаџи Константинов - Џинот, односно од 1858 година, според едни показатели кога е основано читалиштето “Надежда”. Во текот на годините, тоа читалиште е повеќе пати затворано и повторно обновувано.

Подоцна се отворени и други читалишта, како што е читалиштето кај “Чакмак одаја” во 1920 година, исклучиво со напредна литература, а членувале напредни синдикални работници и интелектуалци со марксистички идеи.
Во еден ваков период формирана е и Библиотеката,  во состав на Домот на културата. Во 1953 година се вработува првиот библиотекар со завршено средно библотекарско училиште, г-дин Димче Атанасоски, кој врши стручна обработка на книжните фондови по тогашните библиотекарски правила. Библиотеката веќе почнува да функционира како вистинска културна институција, во која се создадени и првите информативни  каталози и билтени. Веќе во 1955 година, се одделува од Културниот дом и работи како самостојна културно-образовна институција., под името Градска библиотека  “ Борка Талески ” – Прилеп.
Во 1961 година е прместена во подобри простории во куќата на доктор Шајкар, зад Градските кина и добива статус на Матична бибиотека за подрачјето на Општина Прилеп .
Со тоа Библиотеката е исправена пред нови предизвици, имено таа е задолжена да се грижи за развојната политика на библиотечната дејност во Општината и да дава стручна помош на сите библиотекари во училишните и специјалните библиотеки.
Во 1984 година на 11- Октомври- денот на востанието на Макдонскиот народ , Градската  библиотека свечено ги пушта во употреба новите простории во блокот Ц на Домот на културата “Марко Цепенков”, каде што условите за проширување на културно -образовната дејност се поголеми. Се отвора игротека, која ја посетуваат деца од предшколска возраст и се одржуваат курсеви по англиски јазик.
Денес Градската библиотека претставува најдeмократска културна институција која располага со книжен фонд од над 112.000 монографски публикции и со 2.500 комплетирани и укоричени дневни весници и списанија, референтна литература, ракописи, документи, албуми, видео касети, Роднокрајна збирка, Збирка на раритети, докторски и магистерски трудови, музикалии, плакати, Збирка на странска литература и сл. Библиотеката располага со читална за самостојно учење, читлна за следење на печатот и читална за студиско работење.
Во овој шестдецениски растеж Библиотеката беше и своевиден Универзитет. Таа во значителна мера влијаеше на оспособување на кадри. Нејзините богати фондови ги користеа голем број на читатели, и не само од Општинава, но и пошироко, и нејзиното срце пулсира подеднакво, како за постојните  така и за потенцијалните корисници. www.biblioprilep.org.mk/